Համայնքների մասնակցությամբ՝ դեպի ավելի ներառական և կայուն անտառվերականգնում
Միջազգային փորձի փոխանակում Հայաստանում
Հուլիսի 2-9-ը Հայաստանում էր «Հայաստանում անտառների վերականգնում և կլիմայի փոփոխություն» (FORACCA) ծրագրի գենդերային հավասարության և սոցիալական ներառման (GESI) միջազգային խորհրդատու, Alliance of Bioversity International and CIAT-ի փորձագետ Մարլեն Էլիասը։
Այցի ընթացքում անցկացրեցինք երկու աշխատաժողով՝ «FORACCA» ծրագրի իրականացման գործընկերների, Հայաստանի անտառային դաշինքի անդամ կազմակերպությունների, Անտառների, ձյան և լանդշաֆտային հետազոտությունների շվեյցարական դաշնային ինստիտուտի (WSL) և ՄԱԿ-ի Պարենի և գյուղատնտեսության կազմակերպության (FAO) ներկայացուցիչների մասնակցությամբ։ Աշխատաժողովների ընթացքում քննարկեցինք համայնքների հետ ներառական աշխատանքի մոտեցումները, գենդերային հավասարության և սոցիալական ներառման գործիքները, ինչպես նաև դրանց կիրառումը «FORACCA» ծրագրի իրականացման և մոնիթորինգի գործընթացներում։
Դաշտային այցելություններ և համայնքների ձայնը
Առաքելության կարևոր մասը դաշտային այցելություններն էին «Շեն» ԲՀԿ-ի ագրոանտառաբուծական և «Էյ-Թի-Փի» բարեգործական հիմնադրամի անտառվերականգնման ծրագրային տարածքներ։
Լոռու մարզի Լեռնավան բնակավայրում անցկացված կանանց և տղամարդկանց առանձին ֆոկուս խմբային քննարկումները ցույց տվեցին, որ համայնքը մեծ հավատ և ակնկալիքներ ունի արդեն իսկ հիմնված ագրոանտառի նկատմամբ։ Մասնակիցներն այն տեսնում են որպես ծաղկող կանաչ լանդշաֆտ, որը կնպաստի բնության վերականգնմանը, եկամտի աղբյուրների ստեղծմանը, էկոտուրիզմի զարգացմանը և համայնքի երիտասարդների համար նոր հնարավորությունների ձևավորմանը։
Մեծ Սարիար բնակավայրի բնակիչները նույնպես կարևորեցին «Էյ-Թի-Փի» բարեգործական հիմնադրամի կողմից իրականացվող անտառապատման աշխատանքների դրական ազդեցությունը՝ նշելով, որ դրանք արդեն իսկ նպաստել են համայնքում աշխատատեղերի ստեղծմանը, արտագաղթի նվազմանը և արոտավայրերի բարելավմանը։
Համագործակցությունը՝ ծրագրի հաջողության հիմքում
Քննարկումները ևս մեկ անգամ հաստատեցին, որ ծրագրի ամենամեծ ուժը համայնքի մարդկանց նվիրվածությունն ու միասնականությունն է։ Կանայք և տղամարդիկ հավասարապես ընդգծեցին փոխվստահության, համագործակցության և սեփական նախաձեռնությամբ զարգանալու կարևորությունը՝ որպես ծրագրի երկարաժամկետ հաջողության հիմք։
Մարլեն Էլիասի մասնագիտական աջակցությունն ու արժեքավոր գաղափարները կարևոր ներդրում էին ծրագրի համար։ Նույնքան կարևոր էին նաև բոլոր գործընկերների և համայնքների բնակիչների ակտիվ մասնակցությունն ու արդյունավետ համագործակցությունը, որոնք շարունակում են նպաստել ավելի ներառական և կայուն անտառվերականգնման նախաձեռնությունների իրականացմանը։
Հայաստանում անտառների վերականգնում և կլիմայի փոփոխություն» (FORACCA) ծրագիրը համաֆինանսավորվում է Շվեյցարիայի զարգացման և համագործակցության գործակալության (SDC) և Հայաստանի անտառային դաշինքի անդամ չորս իրականացնող կազմակերպությունների՝ «Շեն» բարեգործական հասարակական կազմակերպության, «Իմ անտառ Հայաստան» բնապահպանական հասարակական կազմակերպության, «Էյ-Թի-Փի» բարեգործական հիմնադրամի և Վայրի բնության և մշակութային արժեքների պահպանման հիմնադրամի կողմից։ Ծրագրի իրականացման գործընկերներն են նաև Անտառների, ձյան և լանդշաֆտային հետազոտությունների շվեյցարական դաշնային ինստիտուտը (WSL) և ՄԱԿ-ի Պարենի և գյուղատնտեսության կազմակերպությունը (FAO):
